naše hrajnišća

Němsko-Serbske ludowe dźiwadło je ze swojim wuměłskim profilom a swojej koncepciju w Němskej jónkrótne, a samo w Europje ma lědma swojeho runjeća jako jedne dźiwadło – dwě sparće – tři rěče: Z fuzije Budyskeho měšćanskeho a Serbskeho ludoweho dźiwadła 1963 nastate Němsko-Serbske ludowe dźiwadło zhladuje na 600 lět tradicije dźiwadźelenja a swěry k dźiwadłu. W NSLDź jako jeničkim bikulturnym powołanskim dźiwadle Němskeje skutkujetej činohrajny a klankodźiwadłowy ansambl, kiž hrajetej hornjo- a delnjoserbsce a wězo tež w němčinje. Něhdźe 1.000 zarjadowanjow wob lěto, z toho ca. 25 premjerow, dožiwja wjace hač 150.000 wopytowarjow. A Budyske lětnje dźiwadło je mjeztym kult.

NSLDź wustupuje w dwěmaj twarjenjomaj: we wulkim domje Při Schillerowych zelenišćach/Seminarskej a w Dźiwadle na hrodźe, kiž so zarjaduje do ansambla historiskich twarjenjow Budyskeho hrodu.

Tež na historiskim dworje Budyskeho hrodu hrajemy. A nimo toho na jewišćach w kulturnym rumje Hornja Łužica-Delnja Šleska a w serbskich kónčinach Hornjeje a Delnjeje Łužicy wustupujemy.

Wot 1998 je Lutz Hillmann intendant NSLDź. W ansamblu skutkuje 20 dźiwadźelnicow a dźiwadźelnikow. Wuměłski dorost kubłamy a dobywamy přez naše Serbske činohrajne dźiwadło, Serbske dźěćace kaž tež Młodźinske dźiwadło Serbskeho gymnazija.

NSLDź haji intensiwny, identitu přisporjacy dialog z publikumom a pěstuje kooperatiwne zwiski z partnerami w regionje. Naš dom agěruje tež w syći wšelakich dźiwadłow w Europje, tak z Němskim jewišćom w Szekszárdźe/Madźarska, z Měšćanskim dźiwadłom Brunecka/Italska a z Měšćanskim dźiwadłom w čěskim Brnje.

2014 zwoła NSLDź „ODYSSEY 2014“ – Europski festiwal mjeńšinowych dźiwadłow do žiwjenja.

Dźiwadło ducy

Hrajemy w dźiwadłach, kulturnych domach, šulach, pěstowarnjach, hosćencach, k swjedźenjam, po wšej Łužicy a zwonka njeje.

[Translate to Obersorbisch:] Spielorte