Němsko-Serbske ludowe dźiwadło je ze swojim wuměłskim profilom a swojej koncepciju w Němskej jónkrótne. A samo w Europje ma lědma swojeho runjeća jako jedne dźiwadło – dwě sparće – tři rěče. Z tym słuša k europskim kulturnym drohoćinkam.
Z fuzije Budyskeho měšćanskeho a Serbskeho ludoweho dźiwadła 1963 nastate Němsko-Serbske ludowe dźiwadło zhladuje na 600 lět tradicije dźiwadźelenja a swěry k dźiwadłu.
W NSLDź jako jeničkim bikulturnym powołanskim dźiwadle Němskeje skutkujetej činohrajny a klankodźiwadłowy ansambl, kiž hrajetej hornjo- a delnjoserbsce a wězo w němčinje. Něhdźe 1.000 zarjadowanjow wob lěto, z toho ca. 25 premjerow, dožiwja wjace hač 150.000 wopytowarjow. Hrajna doba skónči so kóžde lěto z Budyskim lětnim dźiwadłom w juniju, juliju resp. w awgusće a bywa wosebity wjeršk.
Nimo wulkeho domu z ca. 400 městnami mamy wot 2003 Dźiwadło na hrodźe. Tam ma klankodźiwadło swój domicil a wotměwaja so čitanja, činohrajne předstajenja w małej formje, dźiwadłowe eksperimenty a předstajenja amaterskeho dźiwadła.
Z někotrymi serbskimi inscenacijemi a z klankodźiwadłom wustupujemy tež na wšelakich městnach w kulturnym rumje Hornja Łužica-Delnja Šleska a w Delnjej Łužicy.
