Deutsch-Sorbisches Volkstheater Bautzen – Němsko-Serbske ludowe dźiwadło Bautzen

Po tym, zo je so loni inscenacija „ChOROwNjA abo Cyły swět je jewišćo“ předstajiła, je so Młodźinske dźiwadło při NSLDź w cyle nowej konstelaciji na hru „Pjeršćeń“ wot Thea Fransza přihotowało. Wot nětčišich sobuhrajerjow su třo hižo w Serbskim dźěćacym
dźiwadle sobu hrali a so nětko w dalšej dorostowej skupinje našeho domu na jewišću pokazaja. W hrě „Pjeršćeń“ dźe wo móc, pjenjezy a wědu. Hra je inspirěrowana wot opery „Der Ring der Nibelungen“ wot Richarda Wagnera. Z wěstym posměwkom so w njej na znatu powěsć wo požadanej debjence zhladuje: pjeršćeń Nibelungow njespožča jenož móc, ale samo knjejstwo po cyłym swěće. Ale njetrjebaće so přez 16 hodźinow trajacu operu wojować, zo byšće jednanju a wšěm zwiskam mjez figurami sćěhować móhli, ale móžeće sej krótšu a bjezdwěla žortnišu wersiju wot Thea Fransza jako dźiwadło lubić dać. A tež lětsa zaso steja serbscy a němscy młodostni zhromadnje na jewišću.