Deutsch-Sorbisches Volkstheater Bautzen – Němsko-Serbske ludowe dźiwadło Bautzen

Wulki dom steji na atraktiwnym městnje na kromje historiskeho stareho města Při Schillerowych zelenišćach/Seminarskej. 1975 bu wotewrjeny a 2006 saněrowany. Tež optisce je twarjenje jara spodobne.

Dom ma přihladowarsku žurlu z 388 městnami.

1968 započa měšćanske zarjadnistwo přetwar tehdyšeho Měšćanskeho dźiwadła při Lawskich hrjebjach planować. Městno za 330 přistajenych w nowozałoženym Němsko-Serbskim ludowym dźiwadle pak dawno hižo njedosahaše a historiske twarjenje dyrbješe so nuznje ponowić. Ale pjenjez bě mało. Krute fakty buchu stworjene, jako 30. decembra 1969 historiske twarjenje dźiwadła prosće rozbuchnychu. Bórze po tym bu twar kulturnych twarjenjow w kraju jara wobmjezowany. Jako wupuć poskići so „přitwar“ při něhdyšim Dźiwadle society na Burskej hasy. (1961 do 1963 bu twarjenje zrekonstruowane, a měšćanske dźiwadło je jako komorne jewišćo ze 196 městnami za přihladowarjow wužiwaše.)

1970 bu Budyska „Króna“ nachwilne hrajnišćo dźiwadła; 1972 započachu z „přitwarom“ na ležownosći Dźiwadła society, štož je dźensa wulki dom NSLDź. Dnja 8. meje bu nowe twarjenje z premjeru „Der kaukasische Kreidekreis“ wotewrjene. 2001 bu dom wotpowědnje wohnjoškitnym předpisam saněrowany, z čimž so njedostatki wotstronichu, kiž zwisowachu z mało pjenjezami w 70tych lětach, jako twarjenje nasta. 31. meje 2003 bě tam na wěsty čas poslednje předstajenje. Nimo zaručenja wohnjoškita so dźěłowe wuměnjenja kołowokoło jewišća widźomnje polěpšichu. Jewišćowa wěža, za kotruž běchu so hižo w 70tych lětach fundament kładli, nětko dźiwadło wudospołnja. W 210. lěće swojeho wobstaća so wulki dom 17. februara 2006 po połtřeća lěće přetwara z premjeru hry „Der Sturm“ zaso wotewrě. Jako hornjoserbska premjera slědowaše 4. měrca „Šwanda – dudak abo Hosćina dźiwich žonow“.