Młodźinske dźiwadło Serbskeho gymnazija při Němsko-Serbskim ludowym dźiwadle Budyšin
W hrajnej dobje 1992/93 załoži so Młodźinske dźiwadło Serbskeho gymnazija při Němsko-Serbskim ludowym dźiwadle. Běše to wuslědk zhromadneje iniciatiwy Serbskeho gymnazija a dźiwadła na namjet Michała Lorenca a Michaela Grossy, tehdyšeho intendanta dźiwadła.
Šulerjo mějachu wottud móžnosć, fakultatiwnje dalši zwonkašulski poskitk wužiwać. Prěnja inscenacija bě „Módra wróna a kontinent nadźija“, wosebity dźiwadłowy wječor, na kotrymž přednošowachu. a předstajichu so teksty Jurja Kocha.
Z toho časa zajim gymnaziastow na dźiwadźelenju přeco bóle rosće. Po komedijach a originalnych serbskich hrach, sćěhowaše w lěće 1997 tragedija Christiana Martina „Winterkrieg“. Je to hač dotal jenička němskorěčna inscenacija dźiwadłoweje skupiny.
K wjerškam Młodźinskeho dźiwadła liči na kóždy pad hra „Fetzer – Čwak młodosće“ z pjera Svena Grunerta z lěta 1998, za kotruž je Ulrich Pogoda hudźbu skomponował. Składnostnje 50. narodnin 1. Serbskeje kulturneje brigady Serbskeho gymnazija dožiwichu přihladowarjo k prěnjemu razej produkciju Młodźinskeho dźiwadła na hłownym jewišću NSLDź. Nimo młodych dźiwadźelnikow skutkowachu w tutym musicalu tež chór, rejowanska skupina a orchester Serbskeho gymnazija sobu.
W hrajnej dobje 1998/1999 přewza dołholětny režijny asistent Michała Lorenca, Torsten Schlosser z načasnym kruchom „Na frasu“ Rainera Hachfelda wuměłski nawod dźiwadłoweje skupiny.
Z hrajneje doby 2012/2013 nawjeduje Měrko Brankačk tute ćěleso.
Młodźinske dźiwadło bě wot spočatka sem žórło za wuměłski dorost serbskeho powołanskeho dźiwadła, tak rjec talentowy labor: Mnozy z něhdyšich čłonow stachu so z elewami činohrajneho studija Němsko-Serbskeho ludoweho dźiwadła Budyšin a pokročowachu swoje powołanske wuwiće w najwšelakorišich wuměłskich wobłukach.
