„Mjeńšinowym rěčam hłós dać“ je hesło mjezynarodneho dźiwadłoweho projekta
Němsko-Serbske ludowe dźiwadło Budyšin je dźěl mjezynarodneho projekta mjeńšinowych dźiwadłow „phōnē“. Na projekće wobdźěla so nimo NSLDź: Tryater z nižozemskeje Friziskeje, Teatr Piba z Bretoniskeje, židowske Teatrul Evreiesc de Stat z Rumunskeje, galiciske AGADIC ze Španiskeje, Stadtheater Bruneck Ladinjanow z Južneho Tirola, Fibin Teoranta z Irskeje a kweniske ITU Teatteriforeeninki z Norwegskeje. Wědomostne přewodźujetej projekt Uniwersita Groningen, kotraž projekt dokumentuje a Lipšćanska uniwersita, kotraž přez Institut za sorabistiku trěbne přełožki zdźěła. Projekt je spěchowany přez Europsku uniju. Wot julija 2022 hač do měrca 2025 wuwiwaja so pod hesłow „tradicija w modernym“ kreatiwne formaty, kiž powědaja wo jednotliwych mjeńšinach. Na kóncu maja w mjezynarodnej wuměnje wosom našočasnych dźiwadłowych hrow nastać a předstajić. Nimo toho ma syć dźiwadłow regionalnych a mjeńšinowych rěčow nastać.
Projekt ma wotpohlad mnohotnosć kultury a rěče spěchować a zawěsćić, kaž tež čłowjekow wšelakorych rěčnych mjeńšinow zwjazać a rěčne a kulturne hranicy přeprěčić.
