Dźiwadło na hrodźe

Nowe twarjenje Dźiwadła na hrodźe bu 12. septembra 2003 wotewrjene. Jako dźěl historiskeho dwora Budyskeho hrodu nasta nowy dom za dźiwadło, kotrež so samo ze swojim modernym wonkownym do wokolneje architektury ze swójskim akcentom zarjaduje. Dźiwadło na hrodźe njeje jenož domicil klankodźiwadła, ale poskićuje so tež za činohru małeje formy, čitanja, dźiwadłowe eksperimenty, hudźbne wječory a amaterske dźiwadło.
Přihladowarnja „wulkeje žurle“ skića po potrjebje 105 do 180 wopytowarjam městno; „mała žurla“ je tohorunja fleksibelnje za něhdźe 70 wopytowarjow zapołožena. Tu překwapi hosći romantiski wid přez hoberske wokno na 1000-lětny Budyšin hač do Łužiskich hór.

Nalěto 2000 wobzamkny Budyski wokrjesny sejmik, zo ma so na městnje něhdyšeho žitneho składu Budyskeho hrodu nowe dźiwadło twarić. W nowembrje 2001 započachu so prěnje dźěła za nowotwar. 3,5 m do hłubokosće, 16 m po šěrokosći a 50 m po dołhosći so jama za fundament twarjenja rozpřestrěwaše. 2002 bě zběhanka.

Dźiwadło bjez praweje tragedije – njepředstajomne! Za škleńčanej fasadu Dźiwadła na hrodźe wita wopytowarjow 15 hoberskich skulpturow Rietschelowych swislow. Rězbar Ernst Rietschel (1804–1861) bě z pěskowca „Wuměłstwo dramatiskeho basnjenja“ za twarjenje noweho hrodoweho dźiwadła Gottfrieda Sempera w Drježdźanach stworił. Po wohenju lěta 1869 započa so za skulptury odyseja. Tehdyši Budyski měšćanosta dr. Johannes Kaeubler docpě, zo buchu swisle 1905 na runje wobnowjenym Měšćanskim dźiwadle připrawjene, hdźež hač do jeho rozbuchnjenja 1969 wuchodne swisle pyšachu. Odyseja skulpturow dźěše dale. Po tym, zo buchu swisle restawrowane, rada města Budyšina wobzamkny, zo maja skulptury swoje městno w Dźiwadle na hrodźe měć.

kontakt

Dźiwadło na hrodźe
Hród 7
02625 Budyšin

telefon: 03591/584-0
faks: 03591/584-200

E-Mail: kontakt@remove-this.theater-bautzen.de

přijězd

parkowanje

Za parkowanje wužiwajće prošu parkowanišća w měsće - na dworje hrodu njesmě so parkować.